Kè ou lèstonmak

(fyèl-é-kouraj ou fon-é-toupé)

A pa tou di répété kon léko :
« Sa ki la pou'w dlo pa'a chayé'y »,
lè sé adan menm ravin-la
swè a'w ka dégouté akontinyé.
Pou sa...lapenn pa vo!

A pa tou di bougonné anbafèy :
« Koken pa'a pwòspéré »,
lè tout volè alèz-kon-Blèz,
lè zafè a yo ka fè lò,
é lè sé'w ki òbò falèz.
Sé vré... lapenn pa vo!

A pa tou di wonchonné an bab a'w :
« Pli ta pli tris »,
si anmenmdètan ou pa vlé vwè
pou kilès
lavi-la pli antòch jou an jou.
Kwè mwen, lapenn pa vo !

A pa tou di chigné dèyè pòt :
« Ka'w vlé fè »,
si vou-menm pa sav
si vou-menm pa ka di sa'w anvi fè.
Lapenn pa vo!

A pa tou di èspéré :
« Bondyé bon !...dèmen ké on dòt jou »,
si apré jòdila séké jimo a jòdila,
pli lèd, pli rèd osi.
Non ! Non ! Lapenn pa vo !

Ka ki pasé'w ?
Ou sé padavwa ou tini onlo kè,
ou sé ni ou pa ni kè menm
pou'w pé sipòté sa !

Men lavalas ja ba'w twòp tòbòk anlè tèt,
zékobèl a solèy ja rantré an chè a'w twòp,
pou yo pé di
ou pa ni fyèl-é-kouraj !
A pa sa.

Sé davwa sé sèvi yo toujou sèvi èvè'w.
Sé twòp lèstonmak yo fè anlè'w,
ki fè ou onjan bat dèyè.
Ou pèd lafwa adan lézòt,
adan vou-menm

Mé kimafoutiésa ?
Pou pòk ou pòkò pòk !
E pon dòt moun ki'w menm
péké pé woté pyé a'w
adan pè pépa-la yo pri la.
Kwè mwen.. lapenn vo!